समाचार
स्याङ्जामा एकैदिन छ जना फरार कसुरदार पक्राउ
वालिङ, ३ असार ।
अदालतको फैसलापछि पनि फरार रहेका विभिन्न मुद्दाका छ जना कसुरदारलाई स्याङ्जा प्रहरीले आइतबार पक्राउ गरेको छ । जिल्ला प्रहरी कार्यालय स्याङ्जाबाट खटिएको विशेष अप्रेसन टोलीले उनीहरूलाई एकैदिनमा पक्राउ गरेको हो । पक्राउ परेका कसुरदारहरुमाथि अभद्र व्यवहार, जालसाजी, चेक अनादर, सवारी ज्यान र कर्तव्य ज्यान मुद्दामा स्याङ्जा जिल्ला अदालतले विभिन्न मितिमा कैद तथा सजायको फैसला गरेको थियो ।
उनीहरुलाई कैद भुक्तान तथा एक्काईस हजार आठ सय रुपैयाँ जरिवाना असुलका लागि आइतबारनै स्याङ्जा अदालतमा बुझाइएको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक प्रशन्न राज चौधरीले जानकारी दिनुभयो । अभद्र व्यवहार कसुरमा पक्राउ पर्नेहरुमध्ये स्याङ्जाको फेदीखोला गाउँपालिका –३ का राजेन्द्र मिजारलाई पाँच हजार रुपैयाँ जरिवाना, फेदीखोला गाउँपालिका –१ का सागर कार्कीलाई १० हजार आठ सय रुपैयाँ जरिवाना तोकिएको थियो ।
यस्तै, जालसाजी मुद्दामा पक्राउ परेका कालीगण्डकी गाउँपालिका –४ का भरतराज पाण्डेलाई एक हजार रुपैयाँ जरिवाना, चेक अनादर मुद्दामा पुतलीबजार नगरपालिका –११ का रमाकान्त पौडेललाई तीन हजार रुपैयाँ जरिवाना, सवारी ज्यान मुद्दामा फेदीखोला गाउँपालिका –१ का प्रेमबहादुर कुँवरलाई चार दिन कैद र दुई हजार रुपैयाँ जरिवाना साथै कर्तव्य ज्यान मुद्दामा पक्राउ परेका बिरुवा गाउँपालिका –८ का हरिबहादुर रानालाई २० वर्ष कैद तोकिएको थियो ।
अदालतबाट भएको फैसला कार्यान्वयनलाई चुस्त, दुरूस्त र प्रभावकारी बनाई न्यायीक कारबाहीलाई पूर्णता दिई, सुरक्षित र न्यायपूर्ण समाज निर्माणको सुनिश्चितताको लागि फरार प्रतिवादीहरु पक्राउ गरिरहेको प्रवक्ता चौधरीले बताउनुभयो । स्याङ्जा प्रहरीले केही समयदेखि अदालतको फैसलापछि फरार रहेका कसुरदारहरुलाई पक्राउ गर्न तिव्रता दिन थालेको छ ।
