समाचार
खहरेमा अभिभावक शिक्षा कार्यक्रम
रेडियो आँधीखोला
वालिङ, १२ असार ।
स्याङ्जाको वालिङ १ खहरेमा रहेको रणबीर जनहित माध्यमिक विद्यालयमा अभिभावक शिक्षा कार्यक्रम गरिएको छ ।
वालिङ सामुदायिक सिकाई केन्द्रको आयोजनामा रणवीर जनहित माध्यमिक विद्यालयका अभिभावकहरुलाई लक्षित गरी अभिभावक शिक्षा कार्यक्रम सञ्चालन गरिएको हो ।
अभिभावक शिक्षा कार्यक्रमको उद्घाटन गर्नुहुँदै वालिङ वडा नं १ का वडा अध्यक्ष एवम् नगर प्रवक्ता पदमराज गुरुङले विद्यालय विद्यार्थी, शिक्षक, अभिभावक तथा ब्यवस्थापन पक्षका समन्वय र सहकार्यले विद्यालय सुधारमा महत्वपूर्ण अर्थ राख्ने भएकाले सबैले मनन गरेर अगाडि बढ्नु आजको आवश्यकता रहेको बताउनुभयो ।
उहाँले नेपाल सरकारको सेवा सुविधा लिनुहुने सम्पूर्ण कर्मचारीहरुले सामुदायिक विद्यालयमै बालबच्चा भर्ना गर्न अनुरोध गर्दै नगरभित्रका सबै विद्यालयहरुको पोशाकमा एकरुपता ल्याउने गरी पहल थालिएको उहाँले बताउनुभयो ।
कार्यक्रममा वालिङ नगरपालिका शिक्षा शाखा प्रमुख ख्यामनारायण काफ्ले, विद्यालयका प्रधानाध्यापक लक्ष्मीप्रसाद रेग्मी, वालिङ सामुदायिक सिकाई केन्द्रका सल्लाहकार भुपराज बगालेलगायतले शुभकामना मन्तब्य ब्यक्त गर्नुभएको थियो ।
वालिङ सामुदायिक सिकाई केन्द्रका अध्यक्ष चक्रबन्धु रेग्मीको अध्यक्षतामा सम्पन्न कार्यक्रममा स्वागत शिक्षक अभिभावक संघका अध्यक्ष होमबहादुर रानाले र सञ्चालन सिकाई केन्द्रका सचिव ध्रुब पंगेनीले गर्नुभएको थियो ।
