धेरै ठाउँमा रातभर वर्षा, आज रातिदेखि पानी पार्ने प्रणाली कमजोर हुँदै जाने

चैत २५, २०८२ बिहीबार, काठमाण्डौ उपत्यकासहित देशका धेरै ठाउँमा रातभर पानी परेको छ । 

मध्य र पश्चिममा पानी पर्ने क्रम रोकिए पनि पूर्वका धेरै ठाउँमा अहिले पनि पानी परिरहेको छ । पश्चिमी न्यूनचापीय प्रणाली र स्थानीय वायुको प्रभावका कारण देशका सबै ठाउँमा बदली भई पानी परेको मौसम पूर्वानुमान महाशाखाले जनाएको छ ।

हिजो दिनभर र रातिको वर्षाका कारण चिसो बढेको छ । उच्च पहाडी तथा हिमाली क्षेत्रमा हिमपात पनि भएको छ । आज पनि केही ठाउँमा पानी पर्ने र रातिदेखि पानी पार्ने प्रणाली कमजोर हुँदै जाने महाशाखाले जनाएको छ । 

महाशाखाका अनुसार आज कोशी प्रदेशलगायत देशका पहाडी तथा हिमाली भू–भागका केही ठाउँहरूमा तथा मधेश प्रदेशका थोरै ठाउँहरूमा मेघगर्जन र चट्याङ्गसहित मध्यम वर्षा र हिमपातको सम्भावना छ ।