समाचार
ला लिगा : भ्यालेन्सियासँगको खेलमा बार्सिलोना बराबरीमा रोकियो, मेस्सीले राखे कीर्तिमान
पुस ५, २०७७ आइतबार
काठमाण्डाै - स्पेनिस ला लिगामा बार्सिलोनाले भ्यालेन्सियासँग २–२ गोलको बराबरी खेल्दै अंक बाँडेको छ । खेलमा अर्जेन्टिनी सुपरस्टार लियोनल मेस्सीले भने पेलेको नाममा रहेको एकै क्लबबाट सबैभन्दा धेरै ६ सय ४३ गोलको कीर्तिमान बराबरी गरेका छन् ।
३३ वर्षीय मेस्सीले पहिलो हाफको अन्तिममा डाइभिङ हेडरको साथमा याे कीर्तिमान राखेका हुन् । उनले प्रहार गरेको पेनाल्टी भ्यालेन्सियाका गोलरक्षक जाउमी डोमेनेचले बचाएपछि फर्किएको बललाई गोलमा परिणत गरेका हुन्।
मेस्सीले बार्सिलोनाका लागि पहिलो गोल सन् २००५ मा अल्बाकेटेका लागि गरेका थिए । पेलेले सन् १९५६ देखि १९७४ सम्म ब्राजिलको सान्तोसमा रहेर १९ सिजनमाद ६ सय ४३ गोल गरेका थिए । मेस्सीले १५ सिजनमै यो सफलता हासिल गरे ।
तर, बार्सिलोना अंक तालिकाको मध्यतिर रहेको टोलीसँग बराबरीमा रोकिन पुगेकाे छ । बार्सिलोना अझै पनि शीर्ष स्थानको एट्लेटिको मड्रिडभन्दा ८ अंकले पछाडि छ । गएराति भएकाे खेलमा एल्चेलाई ३–१ गोलअन्तरले पराजित गरी एट्लेटिकोले २९ अंक बनाएको हो ।
