रेडियो आँधीखोला 

वालिङ, २० साउन ।

पतञ्जली योग समिति वालिङको आयोजनामा रक्तदान कार्यक्रम सम्पन्न भएको छ । समितिको आयोजनामा ऋषिकल्प, विश्वविख्यात आयुर्वेद शिरोमणि आचार्य बालकृष्ण महाराजको ५१औँ जन्मोत्सव तथा जडीबुटी दिवसको अवसरमा रक्तदान कार्यक्रम गरिएको हो । कार्यक्रमको उद्दघाटन गर्दै नगरप्रमुख कृष्ण खांणले आचार्य बालकृष्णले आयुर्वेद तथा योग क्षेत्रमा गर्नुभएको योगदान अतुलनीय रहेको बताउनुभयो । 

आयुर्वेद र योगाभ्यासले व्यक्तिको जिवनलाई सहज र उर्जामय बनाउने भन्दै हाम्रा वरपर धेरै जडिबुटिहरु खेर गईरहेको भन्दै जडीबुटीको सहि पहिचान गर्नका लागी नगरपालिकाले विषेश कार्यक्रम गरी अगाडि बढ्ने बताउनुभयो । कार्यक्रममा ईलाका प्रशासन कार्यालय वालिङका प्रमुख घनश्याम पौडेल, नगरपालिका प्रमुख प्रशासकिय अधिकृत तेजराज शर्मा, नापी कार्यालयका प्रमुख गगन ढकाल, पतञ्जली योग समिति केन्द्रिय सदस्य मैयादेवि पौडेललगायतले बोल्नुभएको थियो । 

कार्यक्रम पतञ्जली योग समिति स्याङ्जाका अध्यक्ष नारायणप्रसाद तिवारीको अध्यक्षतामा सम्पन्न कार्यक्रममा स्वागत महिला प्रभारी कविता भुषाल र संचानल सचिव गिरमान गुरुङले गर्नुभएको थियो । नेपाल रेडक्रस सोसाईटी स्याङ्जाको प्राविधिक सहयोगमा आयोजित रक्तदान कार्यक्रममा २२ जना महिला र ५० जना पुरष गरी ७२ जनाले रक्तदान गरेका छन् । संकलित ७२ युनिट रगत रक्तसंचार केन्द्र स्याङ्जामा राखिएको छ । यसैबीच् आयुर्वेद शिरोमणि आचार्य बालकृष्ण महाराजको ५१औँ जन्मोत्सव तथा जडीबुटी दिवसको अवसरमा बृक्षारोपण समेत गरिएको छ । पतञ्जली स्थित आँधीखोला किनारमा विभिन्न प्रजातिका फुलका विरुवाहरु रोपण गरिएको हो ।