जाडोमा विद्युतीय उपकरणको अत्यधिक प्रयोग गर्दा सावधानी अपनाउन आग्रह

माघ ७, जाडोमा न्यानो बनाउनका लागि प्रयोग हुने विद्युतीय उपकरणको धेरै प्रयोगले स्वास्थ्यमा नकारात्मक असर पुर्‍याउन सक्ने डाक्टरले बताएका छन् ।

प्लास्टिक सर्जन डा.जसवन शाक्यका अनुसार लामो समयसम्म यस्ता उपकरणहरूको प्रयोग गर्दा शरीरमा पानीको कमी हुने र कोठा सुक्खा हुने हुँदा श्वासप्रश्वास र निसासिने लगायतका समस्या देखिन सक्छ ।

विद्युतीय उपकरणहरू हावा ओहोरदोहोर गर्ने ठाउँमा राख्न र उपकरणको प्रयोग बढीमा एक घण्टासम्म मात्र गर्न उहाँको सुझाव छ । साथै दम र एलर्जी भएका व्यक्तिहरूलाई हिटरको प्रयोगले श्वासप्रश्वाससम्बन्धी समस्या थप बढ्न सक्ने उहाँले बताउनुभयो ।

विद्युतीय उपकरणले जलन र दुर्घटनाको जोखिम पनि निम्त्याउन सक्ने भएकाले बालबालिका र जेष्ठ नागरिकलाई यस्ता उपकरणहरूबाट टाढा राख्न उहाँको सुझाव छ ।