वालिङ, १२ फागुन ।

नेपालकै पहिलो नवग्रह मन्दिरको अनुष्ठान, गीता ज्ञान महायज्ञ तथा धार्मिक महोत्सवमा सवाँ करोड (एक करोड २५ लाख) दिप प्रज्वलन गरिएको छ । अर्जुनचौपारी गाउँपालिका–१ जलबराह धार्मिक वनमा निर्माण भएको नवग्रह मन्दिरमा आयोजित धार्मिक महोत्सवको सातौ दिन सोमबारका दिन दिप प्रज्वलन गरिएको हो । 

 

सवा करोड दिप यहाँको नवग्रह मन्दिर, षट्कोण शिवालय र पञ्चकन्या मन्दिरमा एकै चोटी प्रज्वलन गरिएको हो । दिप प्रज्वलनमा हजारौको संख्यामा भक्तजनको सहभागिता रहेको थियो । पालिकाले गत बर्ष शिवरात्री कै दिनमा सुरुवात गरेर एक बर्षमै देशकै पहिलो नवग्रह मन्दिर निर्माण गरेको हो । फागुन १४गते शिवरात्री सम्म चल्ने धार्मिक महोत्सव १४४ बर्षमा आएको महाकुम्भको समयमा महाशिवरात्रीको अवसर पारेर  गरिएको हो । 

 

नवग्रह मन्दिरमा गरिएको धार्मिक महोत्सवमा दैनिक हजारौ भक्तजनले पूजाआजा तथा दर्शन गरेका छन् । मन्दिरमा पुजाको तथा दर्शनको लागि दैनिकजसो भक्तजनको घुइँचो लाग्दा लाइन लगाउनु परेको छ । अनुष्ठान, गीता ज्ञान महायज्ञ तथा धार्मिक महोत्सवको सातौँ दिन सम्म ७५ हजार भन्दा धेरै भक्तजनले पूजाआजा तथा दर्शन गरेको गाउँपालिका अध्यक्ष प्रकाश तिवारीले दावी गर्नुभयो ।  यहाँ देश मात्र नभई छिमेकी देश भारत, जिल्ला मात्र नभई पुर्वको झापा देखी पश्चिमको कञ्चनपुर सम्मका भक्तजनले यहाँको नवग्रह मन्दिरमा पूजाआजा र दर्शन गरेको तिवारीको भनाई थियो ।