वालिङ, २६ जेठ । 

जिल्ला प्रशासन कार्यालय स्याङ्जाले सेवाग्राहीको सहजताका लागि विद्युतीय टोकन प्रणाली सुरु गरेको छ । भिडभाड नियन्त्रण र सेवा प्रवाह सहज बनाउन विद्युतीय टोकन प्रणाली सुरु गरिएको जिल्ला प्रशासन कार्यालय स्याङ्जाले जनाएको छ ।

विद्युतीय टोकन प्रणालीबाट तत्काल राष्ट्रिय परिचयपत्रको लागि मात्र टोकन लिन सकिने व्यवस्था रहेको स्याङ्जाका सहायक प्रमुख जिल्ला अधिकारी एवम् सूचना अधिकारी दीपक पौडेलले जानकारी दिनुभयो । उहाँले पहिलो चरणमा राष्ट्रिय परिचयपत्र बनाउन र लिन आउने सेवाग्राहीका लागि विद्युतीय टोकन सिस्टम सुरु गरिएको बताउनुभयो । सेवाग्राहीले लिएको टोकनको नम्बर अनुसार पालो आउने भएकाले सहज रुपमा सेवाग्राहीले सेवा लिने सक्ने र सुशासन पनि कायम हुने सहायक प्रजिअ पौडेलको दाबी छ ।

यससँगै आगामी दिनमा नागरिकता, नागरिकताको प्रतिलिपी, ई–पासपोर्ट लगायतको सेवा प्रवाहलाई व्यवस्थित र सहज बनाउन विद्युतीय टोकन सिस्टम बिस्तार गरिने सहायक प्रजिअ पौडेलले बताउनुभयो । उहाँले सेवाग्राहीलाई टोकन सिस्टमबाट सेवा प्रवाह गरिने भएपछि अनावश्यक झन्झटको अन्त्य हुने अपेक्षा गरिएको बताउनुभयो । टोकन प्रणाली सुरु भएपछि सेवाग्राहीले सहज रुपमा सेवा पाउनुका साथै कार्यकक्षमा अनावश्यक भिड कम हुने गरेको राष्ट्रिय परिचयपत्र शाखाकी कम्प्युटर अपरेटर ममिता भुसालले बताउनुभयो ।

सेवाग्राहीलाई बिना झन्झट प्रभावकारी ढंगले सेवा लिन पाउने व्यवस्था गरेकाले यसलाई सधैं कायम राख्न सेवाग्राहीहरुले प्रशासनलाई आग्रहसमेत गर्नुभएको छ । सेवाग्राहीहरुले राष्ट्रिय परिचयपत्रका लागि मात्र नभई टोकन सिस्टम प्रशासनले प्रवाह गर्ने अन्य सेवाहरुमा पनि बिस्तार गर्नुपर्ने आग्रह गर्नुभएको छ ।

दुई लाखभन्दा बढी मूल्य पर्ने विद्युतीय सिस्टमको टोकन मेसिन गृह मन्त्रालयको बजेटमा प्रशासनले खरिद गरेको जिल्ला प्रशासन कार्यालय स्याङ्जाका प्रजिअ ईश्वरीप्रसाद अर्यालले जानकारी दिनुभयो। विद्युतीय टोकन सिस्टम राष्ट्रिय परिचयपत्रसँगै अन्य शाखाहरुमा बिस्तार भएपछि प्रशासनबाट प्रदान गरिने सेवा प्रवाहमा थप टेवा पुग्ने प्रजिअ अर्यालले विश्वास व्यक्त गर्नुभयो ।