रेडियो आँधीखोला

वालिङ, १५ भाद्र । 

स्याङ्जाको वालिङ् नगरपालिका –१३ का युवा कवि पारिश्वर न्यौपानेको पहिलो कवितासङ्ग्रह ‘सिरौँला’ शनिबार विमोचन गरिएको छ । वालिङ नगरपालिका –८, बिपि चोकस्थित सुभम् पार्टी प्यालेसमा एक भव्य समारोहकाबीच विमोचनसँगै साहित्यिक विमर्शसमेत गरिएको थियो ।

कार्यक्रममा वरिष्ठ कवि एवं महाकाव्यकार डा. नवराज लम्साल, गण्डकी प्रदेश सभा सदस्य भोजराज अर्याल, डा. शंकरप्रसाद गैरे, ध्रुवप्रसाद शर्मा पङ्गेनी, लक्ष्मीप्रसाद रेग्मी तथा लेखक न्यौपानेले संयुक्त रूपमा कवितासङ्ग्रह ‘सिरौँला’ पुस्तक सार्वजनिक गर्नुभएको हो । 

कवितासङ्ग्रह ‘सिरौँला’ माथि केन्द्रित हुँदै महाकाव्यकार डा. नवराज लम्सालले कवितासङ्ग्रहमा संग्रहित कविताहरु सबैको मन–मनमा भिज्ने रहेको बताउनुभयो । 

कार्यक्रममा प्रदेश सांसद भोजराज अर्यालले सिरौँला शब्द बहुआयामिक शब्द भएको भन्दै कवि न्यौपानेले चयन गर्नुभएको यो शब्दमै धेरै भाव समेटिएको बताउनुभयो । साहित्यले ईतिहासलाई जिवित राख्न, वर्तमान समयमा भएका गतिविधिलाई कलमको माध्यमबाट बाहिर ल्याउन, समाजलाई सहि मार्गमा हिडाउँन समेत मद्दत गर्ने बताउँदै सिरौँला एक कविताको दस्ता भएको बताउनुभयो । 

कार्यक्रममा डा. शंकरप्रसाद गैरे, ध्रुवप्रसाद शर्मा पङ्गेनी, लक्ष्मीप्रसाद रेग्मी र लेखक न्यौपानेले समेत गहन विमर्श गर्नुभएको थियो । वैकल्पिक बाटो पृथक पाइला सिर्जनात्मक अभियानका संस्थापक संयोजक युवाकवि मिलन समीरले सहजीकरण गर्नुभएको विमोचनसँगै आयोजित बृहत् सिर्जना वाचन कार्यक्रममा साहित्यकार सम्भु अर्याल, रेशम गोतामे पराजित, प्रेमबन्दु सुवेदी, लोकहरि पाण्डे क्षितिज, शोमाकान्त लम्साल, गुरु ढकाल, बिन्दुराम भण्डारी, स्मारिका अर्याललगायतले आ–आफ्ना उत्कृष्ट रचनाहरु प्रस्तुत गर्नुभएको थियो । 

रत्नटीका साहित्य संगमबाट प्रकाशित कवितासङ्ग्रह सिरौँलामा १११ वटा कविताहरु संग्रहित छन् । पहिलो खण्डमा १८, दोस्रोमा ५८, तेस्रोमा १३ र चौथो खण्डमा २२ वटा कविताहरु संग्रहित रहेका छन् । कृतिको मूल्य रु. २५० तोकिएको छ । कार्यक्रम लेखक न्यौपानेकी माता टीका कुमारी न्यौपानेको अध्यक्षतामा सम्पन्न भएको हो ।