समाचार
वालिङको आधुनिक बसपार्क निर्माण ६० प्रतिशत काम सम्पन्न
रेडियो आँधीखोला,
वालिङ २३ चैत्र ।
स्मार्ट सिटीको अवधारणामा अगाडि बढेको वालिङ नगरपालिकाले सार्वजनिक यातायात व्यवस्थापनलाई व्यवस्थित बनाउन आधुनिक बसपार्कको काम तीव्र गतिमा अगाडि बढाएको छ । नगरको गौरवको आयोजनाका रूपमा रहेको बसपार्क निर्माण अहिले करिब ६० प्रतिशत सम्पन्न भएको छ ।
वडा नम्बर ६ र ८ अन्तर्गत मिर्दी–सितलनगर क्षेत्रमा ३० रोपनी क्षेत्रफलमा निर्माण भइरहेको नमूना बसपार्कले लामो तथा छोटो दूरीका सवारी साधनलाई सहज सेवा दिने अपेक्षा गरिएको छ । वालिङ बजारजस्तो व्यस्त व्यापारिक केन्द्रमा सवारी पार्किङको समस्या समाधान गर्ने लक्ष्यका साथ आयोजना अघि बढाइएको नगर प्रमुख कृष्ण खाँणले बताउनुभयो ।
प्राविधिक शाखाका अनुसार बसपार्कमा पार्किङ स्थल, मुख्य टर्मिनल भवन, आन्तरिक सडक, शौचालय, टिकट काउन्टर, पसल, वर्कसप, चालक विश्राम कक्ष, गार्ड हाउस, एटीएम, पदमार्ग तथा विद्युतीय सवारीका लागि चार्जिङ स्टेशन निर्माण भइरहेका छन् ।
मिर्दीखोलातर्फको तटबन्ध निर्माण सकिएको बताउँदै इन्जिनियर मणि तिवारीले आँधीखोलातर्फको काम अन्तिम चरणमा पुगेको जानकारी दिनुभयो । उहांका अनुसार टर्मिनल भवन र पिचको काम पनि सकिनै लागेको छ ।
२०८१ जेठ २१ गते सम्झौता भई सुरु गरिएको यस आयोजना २१ महिनाभित्र सम्पन्न गर्ने लक्ष्य छ । करिब ९ करोड ७६ लाख रुपैयाँ लागतमा …खिलुङ कालिका कन्सट्रक्सन–कार्की जेभीÚले निर्माण गरिरहेको बसपार्कको १८ महिनामा ६० प्रतिशत काम सकिएको छ भने बाँकी काम तीन महिनाभित्र पूरा गर्ने लक्ष्य राखिएको छ । यद्यपि, निर्माण सामग्रीमा भएको मूल्यवृद्धि र बिटुमिन अभावका कारण केही चुनौती देखिएका छन् ।
परियोजना नगर विकास कोषको ९० प्रतिशत र नगरपालिकाको १० प्रतिशत लगानीमा अघि बढाइएको हो । प्रारम्भिक डीपीआरमा करिब २१ करोड लागत अनुमान गरिए पनि पहिलो चरणमा अत्यावश्यक संरचना निर्माण गरी करिब १२ करोड रुपैयाँमै बसपार्क सञ्चालनमा ल्याउने योजना बनाइएको छ ।
हालसम्म करिब ४ करोड ३७ लाख रुपैयाँ खर्च भइसकेको छ भने वित्तीय प्रगति ५० प्रतिशत पुगेको छ । निर्माण सम्पन्न भएपछि बसपार्कमा एकैपटक करिब १३० सवारी साधन अट्ने क्षमता हुनेछ । विद्युतीय सवारीलाई समेत प्राथमिकता दिँदै चार्जिङ स्टेशनमार्फत एकैपटक २० भन्दा बढी सवारी चार्ज गर्न सकिने व्यवस्था मिलाइनेछ ।
नगरपालिकाका अनुसार बसपार्क सञ्चालनमा आएपछि बजार क्षेत्रमा हुने सवारी जाम घट्ने, सडक किनारमा हुने अव्यवस्थित पार्किङ अन्त्य हुने र यात्रुले सहज सेवा पाउनेछन् । साथै, बसपार्क …पब्लिक–प्राइभेट पार्टनरसिप मोडेलमा सञ्चालन गरी करिब ७ वर्षभित्र लगानी उठाउने लक्ष्य राखिएको छ ।
सरोकारवाला निकायहरूले बसपार्क निर्माणलाई सकारात्मक रूपमा लिएका छन् । उद्योग वाणिज्य संघ, चेम्बर अफ कमर्श, होटल व्यवसायी तथा यातायात व्यवसायीहरूले सुरक्षा, व्यवस्थापन र सेवा गुणस्तरमा विशेष ध्यान दिनुपर्ने बताएका छन् ।
